ايوة ... هوة العنوان زي ما انت شايفة كدة بالظبط
على عكس ما اتعودنا .... دايما بناخد النصايح من الناس الناجحة ..... طب حد جرب ياخد نصيحة من حد فاشل
ممكن بردة ..! نسمع منة الغلطات اللي وقع فيها علشان ما نعملهاش ....
طب جربت تاخد النصيحة علشان تفشل ...
ثواني بس ياعم ... هو الفشل محتاج نصايح ؟ .... ايوة .. تعال نشوف
النصيحة الاولى : دور على اكتر موضوع ممل على وجة الارض ... حاجة تتسد نفسك بمجرد انك تحاول التفكير فيها ... تحس باكتئاب اول ما تخطر على بالك او اي حد يفكرك بيها و خلي دة موضوع بحثك الرئيسي
النصيحة التانية : اوعى تتعب نفسك و تدور على اي معلومة ... اقعد زي البرنس في البيت و اكتب على الفيسبوك ..(( شفولي واحد بيفهم في الطاقة النووية و النانو تكنولوجي ... عايز اسالة شوية اسئلة )) دة على اساس ان الناس دية مش لاقية شغل و اول ما هتشوفك هترمي نفسها تحت رجليك
النصيحة التالتة : اول ما العالم النووي يظهر و قبل ما تكلمة عن موضوع بحثك اسألة (( هوة انت بتفهم في المواضيع دي ؟؟)) .. يفضل انك تسال السؤال دة و انت واقف بعيد عنة علشان تلحق تهرب .. :)
النصيحة الرابعه : اوعى تبذل اي مجهود اوعى تتعب و تفكر تروح تدور في المكتبة ... كفاية على مشروعك 3 دقايق شغل في الشهر و ممكن تشتغلهم و انت بتعمل حاجة تانية (( بتتفرج على مسلسل مثلا ...))
النصيحة الخامسة : اوعى تسجل اي حاجة او تستخدم دفتر ملاحظات او تدون افكارك (( العلم في الراس مش في الكراس ))
النصيحة السادسة : اول ما تقابل اي عقبة او مشكلة ... اقلب البحث .. و قول لنفسك ... هوة انا يعني هقطع نفسي (( النت فصل ... بلاها خطوة الخلفية العلمية ..))
النصيحة السابعه : اتسنكح على كل اللي حواليك ... خلي حد يدورلك ... و حد تاني يكتبلك ... و حد تاني يفكرلك ... و بالمرة شوفلك حد يهرشلك في ضهرك
النصيحة التامنة : ما تعملش اي تجارب ... و فبرك النتايج ... اضرب اي ارقام و رسومات و قول ان انت اللي عاملها
النصيحة التاسعه : اسهل طريق للفوز لوحة العرض (( مليها بقى الوان و زينة و حركات و كلام مزخرف علشان ماحدش يعرف يقراة ))
النصيحة العاشرة : انت برنس .. يعني قوانين المعرض ما تنطبقش عليك ... دية اتعملت للعيال الصغيرة ... لكن انا اعمل اللي على مزاجي
النصيحة الاخيرة : و طبعا دية النصيحة المهمة .. (( لا تؤجل عمل اليوم الى الغد )) طالما قدامك وقت لية ما تخليهاش ليلة المعرض
طبعا بعد النصائح دية احب اقوللك (( مبروك الاعدام يا برنس :) ))
هناك تعليق واحد:
جميل يا وسيم .... فكرة رائعة
إرسال تعليق