تمام كدة ... دلوقتي عدينا مرحلة ازاي اجيب فكرة ... و لازم علشان اجيب فكرة يكون عندي مهارات البحث (( اعرف ادوَر يعني ))
بس اللي كتير مننا ما يعرفوش ان في مرحلة مهمة جدا قبل عملية البحث و هية
- هبحث على اية ؟
- هبحث فين؟
- هبحث ازاي؟
- هبحث امتى ؟
- اتاكد ازاي ان نتيجة البحث دي صحيحة ؟
هدور على اية : كتير مننا اول ما يفكر يبحث .. يفتح على جووجل و يكتب اللي في بالة ... و الكلام دة مش علمي ولا منهجي ... امال ابحث ازاي ؟
لازم تكتب في ورقة كدة (( دفتر ملاحظاتك )) .. انت عايز تدور على اية ؟ و اية الجمل اللي هتكتبها في البحث ؟ و دة اللي بنسمية الكلمات المفتاحية يعني بالعربي قبل ما تبدا البحث لازم يكون عندك شوية كلمات مفتاحية ...و دية شوية نقاط تاخد بالك منها و انت بتكتب كلماتك المفتاحية
- افهم موضوع البحث كويس و حلل الموضوع و اكتب المفاهيم الاساسية علشان تكون منها كلمة مفتاحية
- استخدم جمل قصيرة (( اختصر ))
- استخدم الافعال الاصلية و لا تضعها في صورة (( فعل ماض او امر ))
- استخدم الاسماء او الكلمات الشائعه
- تاكد من كتابة الكلمة بصورة لغوية صحيحة (( spelling ))
- ترجم هذة الكلمات المفتاحية للغة الانجليزية
- كون عدد من المترادفات لكلمات بحثك
- ما تحطش اسئلة و علامات استفهام
- دة محرك بحث مش برنامج ما يطلبة المستمعون (( هيطلع اللي هتكتبة بس مش هيضرب الودع ولا هيشم على ضهر ايدة ))
كدة تمام ... يبقى انت كدة يا برنس عندك لستة جاهزة باسماء الحاجات اللي انت هتدور عليها
نبدا بقى المرحلة اللي بعد كدة اللي هية
هبحث فين .... كتير مننا للاسف بيعتقد ان عملية البحث يعني انترنت بس ... و انترنت يعني جووجل بس .... مع العلم ان الغالبية العظمى من المعلومات متاحة دلوقتي على الانتر نت لكن مش معنى كدة ان احنا نهمل النسبة الباقية ... مع العلم ايضا ان اغلب كلامنا في الموضوع دة هيكون عن الانترنت ... و من امثلة المصادر الاخرى
- الانترنت
- الكتب و المكتبات
- النشرات الدورية لمراكز الابحاث المتخصصة
- المجلات العلمية (( العلوم - العلم - العربي العلمي - ناشونال جوجرافيك - افاق العلم - ..... ))
- لقائات مع الخبراء و المتخصصين
هبحث ازاي: و في الجزئية دية هنتكلم عن طرق البحث على الانترنت
قبل ما تفتح الانترنت و تفتح محرك البحث دور الاول في الاماكن اللي انت تعرفها
يعني اية ادور في الاماكن اللي انا اعرفها ؟؟
- مثلا لو المعلومات اللي انا عايزها بتتكلم عن غاز الميثان ... يبقى اروح على المواقع اللي انا اعرفها و اللي بتتكلم في الكيمياء
- او تستخدم ادلة البحث ... و ادلة البحث هي عبارة عن مواقع بتساعدك في تحديد كلمات بحثك لو هناخد المثال اللي فات غاز الميثان (( هتدخل على دليل البحث ... تدخل على تبويب العلوم ... بعدها تبويب الكيمياء ... بعدها تبويب الكيمياء العضوية ... بعد كدة تكتب كلمة بحثك )) و من امثلة ادلة البحث موقع Excite , Myway
بعد كدة تسال نفسك اية المعلومة اللي انت عايزها ؟ ... خاصة ولا عامة ولا حكومية
العامة : معناها انك عايز معلومات عامة عن موضوع معين و دية بيوفرها ليك اي محرك بحث عادي
الخاصة : و دية معلومات غير موجودة في اماكن عامة .. معلومات دقيقة و تفصيلية و دي هتحتاج ليها محرك بحث خاص (( محرك بحث جامعي .. او خاص بمكتبة او محرك بحث علمي )) زي المواقع التالية :
- مواقع بحث علمية (( scirus , ojose , scholar , wolframalpha ))
- مواقع مكتبات (( موقع مكتبة الاسكندرية , موقع اتحاد مكتبات الجامعات المصرية ))
مع الاخذ في الاعتبار ان مواقع المكتبات توفر اسماء كتب و الابحاث و رسائل الماجستير و الدكتوراة و ملخص عنها و مكانها و تاريخ اصدارها
الحكومية : و دية اسرار دولة عليا :) ..... بهزر طبعا
المعلومات الحكومية هي معلومات احصائية عن الدولة زي (( عدد السكان , نسبة المراهقين , عدد المتسربين من التعليم , نسبة الزواج , الطلاق , المواليد , ....... )) و المعلومات اللي زي دي لازم تكون مترخة (( يعني ليها تاريخ .. البيان دة سنة كام .. و افضل و ادق مكان للمعلومات دي الجهاز المركزي للتعبئة العامة و الاحصائات او احد الفروع في المحافظات لو انت عايز معلومات خاصة بمنطقتك
نصائح للبحث
- ** كتير جدا بيطلع في نتائج البحث معلومات غير مرتبطة او غير مرغوبة مثلا ببحث عن جبنة رومي ... الاقي في نتائج البحث كلاب رومي ... الحل بتاع الموضوع دة ان احط كلمة البحث بين علامات تنصيص زي كدة " جبنة رومي " في الحالة دية هيبحث عن الكلمة على بعضها مش كل كلمة بصورة منفردة
- ** برضة كتي بيطلع نتائج غير مرغوبة .. في الحالة دية باستخدم الادوات المنطقية مثلا مش عايز كلمة كلاب تطلع في البحث خالص باكتب قبلها كلمة NOT او علامة الناقص - زي المثال دة (( جبنة رومي - كلاب ))
- **العكس صحيح لو بدور على حاجتين مرتبطين ببعض بكتب بينهم كلمة AND او علامة الزائد + و دة مثلا لو هدور على جبنة بيضة مع الجبنة الرومي (( جبنة رومي + بيضة ))
- لو بدور على حاجة واحدة ليها اكتر من مرادف فمثلا الكيمياء الفيزيائية ساعات تبقى مكتوبة كيمياء طبيعية في بعض المواقع و الحل لو انا عايز ادور على الاتنين بكتب بينهم كلمة OR زي المثال التالي (( كيمياء فيزيائية or طبيعية ))
- تاكد دائما من تاريخ كتابة اي معلوما حصلت عليها علشان ما تبنيش بحثك على معلومات قديمة
- و اخيرا حاجة بستعملها انا بصورة شخصية..... كتير جدا موقع البحث بيوديك على موقع تلاقي الموقع دة قافل .. طب هنجيب المعلومات اللي علية ازاي ؟؟ ... في الحالة دية بستخدم الانترنت ارشيف ادخل جربة بنفسك
في الشكل التالي هتلاقي خوارزم مبسط هيساعدك في عملية بحثك
اضغط على الصورة لتكبيرها
نيجي بقى للسؤال التالت : هبحث امتى ؟
شوف الوقت اللي يناسبك .. و يفضل يكون وقت كبير .. مش تقول قدامي 10 دقايق ادور على الانترنت
البحث على الانترنت محتاج صبر زي ما هو محتاج مهارة .. مش مجرد كتابة و خلاص
كمان النتائج اللي بتطلع ليك من البحث لازم تقراها كويس و تفهمها مش مجرد تاخدها كوبي و تحفظها و خلاص و تخليها حسب التساهيل :)
يعني من الاخر تكون فايق و رايق و و الطاسة مظبوطة
اخر سؤال : ازاي اتاكد ان نتيجة بحثي صحيحة ... او المعلومات اللي جبتها صحيحه
طالما انت جبت المعلومات بتاعتك من المصادر الاولية تبقى 100% صحيحة ... لحظة بس !! يعني اية مصدر اولي ؟؟
مصدر اولي يعني اول مكان او مصدر اتكلم في المعلومة .. هنقول مثال علشان توضح
- معلومات خاصة ببيانات احصائية عن عدد السكان يبقى مصدرها موقع الجهاز المركزي للتعبئة و الاحصاء .. مش موقع جريدة الاخبار .. و لا منتدي فتكات
- معلومات عن مرض الحمى القلاعية ... يبقى مكتبة كلية الطب البيطري ... او موقع متخصص في الطب البيطري .. مش الفيسبوك
تاني حاجة ما تعتمدش على مواقع الاخبار و المنتديات و الفيسبوك و الويكيبديا فقط في الحصول على مصادر معلومات لان دي كلها مصادر غير اولية ... و كل محتوياتها اساسا جاية من مصادر اولية مش من الهوا
تالت حاج بقى .. مواقع التواصل الاجتماعي تعتبر مصدر ثري جدا بالمعلومات ... لحظة يا عم الحج !!
مش من شوية لسة بنقول ان الفيس بوك مش مصدر اولي ... ؟
طبعا .. لكن الفيس بوك هتلاي فية جروبات علمية متخصصة تابعة لجامعات و مراكز ابحاث
و الميزة الكبيرة فية انك ممكن تسال و حد يرد عليك ... و في الاخر لما تحصل على المعلومة ابقى اسال و قول اية مصدر المعلومة دية .. هتلاقي الف مين يدلك عليها (( يعني خبير ببلاش ))... و بكدة هتلاقي استخدام اخر للفيس بوك غير المزرعه السعيدة :)
نصيحة اخيرة : لاما تلاقي ممواقع فيها معلومات تهمك .. ماتحطوش في Bookmark و خلاص , خد المحتوى بالكامل كوبي و خد اسم الموقع و الرابط URL معاة ... ساعات كتير محتويات المواقع بتتغير او بتتمسح .. الطريقة دية اضمن حاجة ليك
ياريت ما كنتش طولت عليكو في الكلام ... بس بيني و بينكو عملية البحث دية عملية مهمة جدا و من اهم صفات الباحث الناجح
هناك تعليق واحد:
الله عليك مستر وسيم ربنا يذيد من امثالك
إرسال تعليق