هنتكلم النهاردة عن شوية اشاعات عن معارض العلوم و البحث العلمي
***
الاشاعه الاولى : عندي مذاكرة و هضيع وقتي في البحث
طبعا مستقبلك مهم جدا و دة شئ لا خلاف علية , لكن السؤال هل البحث العلمي هيضيع وقتك ....
بالعكس .. دة هتكسب بية وقت .. مجرد انك تعرف تفكر بصورة صحيحة هيساعدك على الاستيعاب بصورة افضل , و هيبقى الوقت اللي انت محتاجة في المذاكرة اقل بكتير (( مش محتاج انك تقعد تدح و تحفظ طول اليوم )) من الاخر (( فاهم ... مش حافظ ))
***
الاشاعه الثانية : انا مش لاقي معلومات خالص عن البحث بتاعي
كتير مننا بيدور عن معلومات عن البحث بتاعه و مش بيلاقيها .... و بيقول مش لاقي حاجة خالص عن البحث بتاعي ...
و العيب بكل بساطة ان صاحبنا بيدور في مواقع بحث عامة , و علشان تلاقي الحاجة اللي انت عايزها بسهولة لازم تدور في اماكن متخصصة ... و دية شوية مواقع علمية متخصصة scirus , ojose , scholar , wolframalpha ممكن تستعين بيها في عملية البحث بس اغلبها طبعا بالانجليزي
***
الاشاعة الثالثة : دورت في كل المواقع العلمية و مش لاقي معلومات عن البحث بتاعي
و دة في الغالب بيحصل كتير لعدة اسباب منها ان ساعات بنكتب اسم كبير في خانة البحث و بالتالي مش بنلاقي نتيجة , و علشان احصل على نتيجة صحيحة , لازم اقسم موضوع البحث بتاعي لمواضيع فرعية و ابحث في كل موضوع لوحدة , و بعد كدة اجمع المعلومات و اربطها ببعضها و بالتالي احصل على نتيجة
***
الاشاعه الرابعه : العقبة الكبرى بالنسبة ليا الفلوس (( عايز تموين ))
ليك عندي خبر حلو و خبر وحش .... نبدا بالحلو .. التفكير ببلاش ... مش محتاج غير انك تشغل مخك و تفكر ... و قدامك شغل تفكير و بحث طوييييييييل قبل ما توصل لمرحلة التنفيذ ,, الخبر الوحش بقى ... ما حدش هيديك فلوس و انت بتقول كلام في الهوا
لازم قبل ما حد يوفر ليك دعم مادي تقنعة بافكارك و نظرياتك و تجاربك و الماكيتات و التصاميم الاولية و بعدها هيفكر في الموضوع
***
الاشاعه الخامسة : يعني انت هتخترع الذرة يا خي
و الاشاعه دية من النوع اللي بتتقالك و بتسمعها من ناس كتير , طالما انت ماشي على طريق صحيح , ما يهمكش الناس بتقول اية , و اللي زي دة ما تردش علية بالكلام ,ترد علية بالفعل (( مش تضربة يعني D: .. )) لكن بالنتيجة اللي انت وصلت ليها
***
الاشاعه السادسة : عمري ماكسبت في معارض العلوم
المكسب مش انك تاخد جايزة او هدية او ميدالية .. المكسب انك تكون افضل من الاول ... و اكيد كل مرة تشارك فيها بتكون خبرتك اكتر من المرة اللي قبلها ... و دة هيساعدك جدا في مستقبلك و حياتك الشخصية و العملية
***
الاشاعه السابعه : لو عملت نموذج غالي و متكلف هكسب في المعرض
في الغالب اصحاب الفكرة دية بيصابو بالاحباط في نهاية المعرض علشان ما كسبوش , لانهم بكل بساطة اهتمو بالنموذج النهائي على حساب خطوات البحث العلمي , و دة بيقلل في درجة تقييمة
***
الاشاعه الثامنة : لو جبت واحد زميلي في المشروع هاخد درجات العمل الجماعي
احب اقوللك يا برنس ان المحكم هيفقسك اول ما يبص في عنيك انت و زميلك و هتاخد الصفر المتين في العمل الجماعي
***
الاشاعه التاسعه : المساعدة
تلقي المساعدة من الخبير او المشرف هو سلاح ذو حدين , لازم تمسك العصاية من النص , المساعدة الاكثر من اللازم تضر بالمشروع و يصبح الطالب اتكالي , و عدم المساعدة نهائيا تضر بالمشروع و يكون المشروع بة كثير من القصور
***
الاشاعه العاشرة : قواعد المعرض صعبة ... حاجات كتير ممنوعه
دية قواعد اللعبة ... و اللعبة بتكون ممتعه اكتر لما نلعبها حسب القواعد ... مثلا ينفع تلعب ماتش كورة و كل واحد جاي على مزاجة .. اللي في جيبة مطوة و اللي شايل شومة ؟؟ .... بالاضافة ان دية قواعد المعارض و البحث العلمي العالمية
***
و اخيرا يا ريت ما نمشيش ورا الاشاعات و نتاكد من الحقائق بالتجارب التي تثبت ذلك ... و دة اساس من اسس البحث العلمي
ليست هناك تعليقات:
إرسال تعليق