طبعا اول ما هيجي في بالك الاعلان بتاع ميرندا يوسفي ... بس هوة بيقوللك اشربها ما تفصصهاش ... و انا بقول العكس !
تيجي نحلل الموضوع دة من منظور علمي .. (( بطريقة كلام علمي )) و نشوف مين الصح .. :)
يلا بينا ....
منطقيا .. عمرك شفت حد بياكل اليوسفي على بعضة مرة واحدة من على الشجرة .... لا طبعا ..
لازم الموضوع دة يمر بعدة مراحل
- تتاكد ان اليوسفي سليم و صالح للاكل
- تقشرها بعد كدة
- تفصصها
- تستمتع و انت بتاكلها
- تضرب كمان واحدة لو عجبك طعمها :)
اتكلمنا كتير على اليوسفي .... اية علاقتة بالكلام العلمي بقى
التفصيص دة عادة فطرية في الباحث او العالم ... ما يشربش الحاجة الحاجة علطول ... لازم يفصصها و يعرف اصلها و فصلها و مدى صحتها و دقتها و ازاي يقدر يستفيد منها .... يعني من الاخر ازاي ابقى محدد و دقيق في كل خطوة من خطواتي
و يستحسن احط لنفسي شوية اسئلة استخدمها في عملية التفصيص , و هي :
- مين ؟
- اية ؟
- امتى ؟
- فين ؟
- لية ؟
- ازاي ؟
هناخد مثال للتوضيح :
انت دلوقتي بتدور على موضوع تبدا بية بحث علمي و مشيت في الشارع و انت بتفكر.... و فجأة قعد تكح بشدة و ساعتها جت في بالك فكرة موضوع التلوث ... و قولت هبدا بحث عن التلوث !
بس مش التلوث دة موضوع كبير ؟؟ وواسع ؟ ....... ما احنا هنبدأ التفصيص اهه بالاسئلة بتاعتنا
- مين اللي بيسبب التلوث ؟
- اية نوع التلوث اللي عايز ادرسة ؟
- امتى بيوصل فية التلوث لنسبة القصوى ؟ ..
- فين اكتر مكان بتكون النسبة فية عالية ؟
- لية التلوث دة موجود ؟ و اية الضرر اللي بيسببة ؟
- ازاي اقدر اقلل منة ؟ او اوقفة ؟ او استفيد منة ؟
يبقى انت بقى دلوقتي حطيت شوية اسئلة تبدا تدور فيها على معلومات علشان تبدأ خلفيتك العلمية .... و هتساعدك انك تكون محدد جدا (( ازاي استفيد من غاز اول اكسيد الكربون الناتج من احتراق الوقود في السيارات ؟ ))
و نصيحة اخيرة :
مش على قد بحثك بس .... استخدم مبدأ التفصيص في حياتك في مدرستك في مذاكرتك .... و اوعى تشرب اي حاجة من غير ما تفصصها :)
.
ليست هناك تعليقات:
إرسال تعليق