طبعا كلنا تابعنا الراجل اللي نط من الكبسولة الفضائية ... على القناة العربية الوحيد اللي خنقتنا .. بصراحة و انا بتفرج افتكرت ذكريات الطفولة (( برنامج ماما سامية في سينما الاطفال )) الفيلم بيحكي في موضوع و المذيعه (( ماما سامية )) بتحكي قصة تانية خالص
المهم ....
بردة سمعنا ناس تانية بتفتي ... باي باي نيوتن ... و قانونك فشنك ..
طيب ... تعالو نشوف الراجل النمساوي دة عمل اية من المنظور العلمي
الراجل قرر انة ينط من على ارتفاع كبير جدا علشان يحقق شوية ارقام قياسية و هي :
- اعلى ارتفاع في منطاد هيليوم 39.045 كم
- الوصول لحدود الفضاء الخارجي خارج طبقة الستراتو سفير
- اختراق سرعه الصوت بجسمة 1,342 كم/الساعة 1,24 ماخ
- اطول فترة سقوط
طبعا هوة حقق اول 3 منهم
الصورة دية هتساعدك انك تتخيل اللي عملة الراجل دة
امال اية حوار نيوتن و قوانين نيوتن ... اية اللي اتغير فيها
في قانون بيقول ان السقوط الحر لاي جسم ناحية الارض بتكون سرعتة 1223 كم/ في الساعه .. طب الزاي الراجل لما نط كانت سرعه سقوطة 1342 كم /الساعه ... يعني قانون نيوتن فشنك ؟؟؟
لا طبعا
القانون صحيح لانة بيعتمد على كثافة الهواء
طبعا عارفين ان الراجل طلع فوق طبقة الستراتو سفير و كانت درة الحرارة 10 درجات تحت الصفر و الضغط الجوي 0.05 بار
يعني الهواء منعدم تماما و مافيش اي مقاومة للسقوط
و بالتالي الظروف اختلفت عن قانون نيوتن (( يبقى القانون مش غلط )) كل اللي هيحصل ان كثافة الهوا مش هتبقى ثابتة ... هتتغير
طبعا لاحظتو ان سرعتة قلت لما قرب من الارض بسبب زيادة المقاومة بسبب زيادة كثافة الهواء و طبعا ارتفاع درجة الحرارة عند اختراقة الغلاف الجوي (( الخوذة كانت بتطلع شرارة )) :)
من الاخر ... الناس دية حاسبة كل حاجة .... بالورقة و القلم
هوة طالع الارتفاع دة مخصوص علشان كثافة الهوا و يقدر يخترق حاجز الصوت و بالمرة يحقق شوية ارقام قياسية
و نصيحة اخيرة ... لو في حدث زي كدة ... اتفرج علية اونلاين على اليوتيوب ... و اوعى تتفرج على القنوات العربية ... بصراحة جالي شلل من المذيعه
هناك تعليق واحد:
جزاكم الله خيرا..جهد مشكور...زاضحت الرؤية
إرسال تعليق