كلنا طبعا سمعنا عن القصه بتاعة رواد الفضاء الامريكان اللي طلعوا في الفضاء و و لما حبو يكتبوا لقو الاقلام مش بتكتب علشان ما فيش جاذبيه ... فنزلو تاني و راحو لناسا اللي بدورها عملت ابحاث بملايين الدولارات علشان يخترعو قلم بيكتب من غير جاذبيه و يقدرو يستخدمو القلم في الفضاء ... و بردة الاسطوره كانت بتقول ان الروس كان عندهم نفس المشكله فوفروا الملايين و استخدمو القلم الرصاص
احب اقولكو ان الروايه دي 100 % غلط :) ... ليه بقى ؟
بص يا سيدي
اسواء حاجه تبعتها مع رائد فضاء هي ( حاجه بتوصل كهربا و حاجه قابله للاشتعال ) و الحمدلله الاتنين دول متوفرين في القلم الرصاص
القلم الرصاص زي ما احنا عارفين بيحتوي على الجرافيت اللي هوه موصل ممتاز للكهربا بالاضافه انه قابل للاشتعال لانه اساسا كربون ..
طب ايه المشكله ..... بص يا سيدي عندنا مشكلتين في القلم الرصاص
- احتمال ان السن بتاع القلم يتكسر و يسرح في الفضاء جوه المركبه (( علشان ما فيش جاذبيه )) و يدخل في اي حته يبوظ الدنيا
- اثناء الكتابه الغبار بتاع الجرافيت دة هيطير في الهوا و دة مش صحي على رواد الفضاء انهم يتنفسوه غير طبعا انه قابل للاشتعال في بيئه غنيه بالاكسجين
طب رواد الفضاء بيكتبو ازاي
جة واحد امريكاني اسمه باول فيشر (( مش ناسا و لا روسيا )) اخترع القلم اللي بيكتب في الفضاء من غير جاذبيه و باعه لناسا و لروسيا و سمى القلم باسمه Fisher Space Pen
طب القلم بيشتغل ازاي ؟
بكل بساطه فكره القلم بتعتمد على انه حط نيتروجين مضغوط ((علشان النيتروجين غاز خامل غير قابل للاشتعال )) في الانبوبه مع الحبر و قفل عليها كويس والقلم بقي يكتب من غير جاذبيه
ملحوظه : النيتروجين مضغوط مش سائل علشان اللي هيقولي الحبر ما اتجمدش ليه
و دي حته من براءه اخراع فيشر بتوضح فكرة القلم
طبعا الكلام دة كان سنه 1965 و ناسا اشترت من الراجل دة 34 قلم و القلم كان تمنه ايامها حوالي 128 دولار
و الراجل عجبه الموضوع و طور في القلم و بقى يكتب تحت الميه و على الورق المبلول و الزهر لعب معاه و عمل موديلات كتير من القلم ده
و اخيرا لو حبيت تشتري قلم زي دة (( يمكن في يوم من الايام تروح الفضاء و تحب تكتب حاجه )) فيشر عمل موقع فيه موديلات كتير للقلم دة و حاجات تذكاريه كتير و تقدر تشتريه من موقعه http://www.spacepen.com
ليست هناك تعليقات:
إرسال تعليق